అద్దె అడిగిన పాపానికి.. లాయర్‌ను నడిరాత్రి కాల్చి చంపేశారు!

బెంగళూరు నగరంలో దారుణ ఘటన చోటుచేసుకుంది. అద్దె చెల్లించడం లేదని నిలదీసినందుకు ఇద్దరు వ్యక్తులు తమ ఇంటి యజమానిని తుపాకితో కాల్చి చంపారు. వైట్‌ఫీల్డ్ పోలీస్ స్టేషన్ పరిధిలోని పట్టందూర్ అగ్రహారలో ఆదివారం అర్ధరాత్రి ఈ దారుణం జరిగింది. మృతుడిని అదే ప్రాంతంలో నివసించే న్యాయవాది మంజునాథ్ (42)గా పోలీసులు గుర్తించారు.

పోలీసులు అందించిన వివరాల ప్రకారం, మంజునాథ్‌కు చెందిన ఇంట్లో ఇద్దరు యువకులు అద్దెకు ఉంటున్నారు. కొంతకాలంగా వారు అద్దె సరిగా చెల్లించడం లేదు. ఈ విషయమై ఆదివారం రాత్రి యజమాని మంజునాథ్‌కు, వారికి మధ్య తీవ్ర వాగ్వివాదం జరిగింది. గొడవ ముదరడంతో ఆగ్రహానికి లోనైన నిందితుల్లో ఒకరు తుపాకితో మంజునాథ్ తలపై అతి సమీపం నుంచి కాల్పులు జరిపాడు. ఈ ఘటనలో తీవ్రంగా గాయపడిన ఆయన అక్కడికక్కడే ప్రాణాలు విడిచారు.

ఆ  వెంటనే నిందితులు ఇద్దరూ ఘటనా స్థలం నుంచి పరారయ్యారు. వీరిద్దరూ డెలివరీ బాయ్స్‌గా పనిచేస్తున్నట్లు పోలీసులు ప్రాథమికంగా నిర్ధారించారు. సమాచారం అందుకున్న వైట్‌ఫీల్డ్ పోలీసులు వెంటనే ఘటనా స్థలానికి చేరుకుని వివరాలు సేకరించారు. మృతుడి కుటుంబ సభ్యుల ఫిర్యాదు మేరకు హత్య కేసు నమోదు చేసి, దర్యాప్తు ప్రారంభించారు. పరారీలో ఉన్న నిందితులను పట్టుకునేందుకు ప్రత్యేక బృందాలను రంగంలోకి దించి గాలింపు చర్యలు ముమ్మరం చేశారు. అద్దె గొడవే ఈ హత్యకు ప్రధాన కారణమని భావిస్తున్నప్పటికీ, ఇతర కోణాల్లోనూ విచారణ జరుపుతున్నట్లు పోలీసులు తెలిపారు.